SI KABAU JO BUYUANG JANIH

SI KABAU JO BUYUANG JANIH

Oleh; Asneli*

Nagari Kubang talatak di Limau Manih Kecamatan Pauh Kota Padang. Di nagari nan sajuk jo subur ko, cocok bana untuk urang bakarajo ka sawah, bataranak sarato baladang. Nagari nan subur banyak rumpuik tumbuah, sajauh mato mamandang nan taliek padang hijau nan mahampa, sahinggo mambuek nagari ko cocok untuk bataranak. Taranak masyarakat pado umumnyo kabau karano salain rumpuik nan banyak nagari ko terkenal pulo dek rawa nyo. Sahinggo cocok bana tampek yang cocok untuk kabau bakubang.

Pada maso tu ambo nan sadang duduk basamo amak jo Abak sarato kawan sapamainan nan banamo Lela, hari nan iyo sadang paneh garang matohari nan sadang di ateh kapalo bataduhlah kami di bawah batang nan rindang, dibilai dek angin manyapu muko nan merah taraso sajuk di badan.

Bacarito carito lah ambo jo Si Lela, Abak jo amak malanjuik an karajo di sawah

“Lela, baa dek namo nagarai ko Kubang” tanyo ambo

“Mako nagari banamo Kubang dek ulah ado carito Si Buyung Janih jo Kabau dulu” jawek Lela, nan sadang manyanda di bawah batang baringin tu

“apo carito nyo tu Lela”tanyo ambo sarato panasaran

Jadi carito nyo mode iko aaaa, (bacarito lah Lela ka ambo sambi duduk mangalai di bawah batang)

Pado maso itu hiduik lah si Buyuang Janih jo amaknyo, Buyuang Janih ko urang nan elok, patuh jo rang gaeknyo, sumbayang jo mangaji, priaku nyo nan elok mambuek urang sanang kapadonyo. Si Buyung anak yatim, inyo hanyo tingga basamo amaknyo nan alah gaek.  Karajonyo manolong amaknyo ka sawah jo manggambalo, sadari ketek buyung hanyo tingga baduo jo amaknyo sampai lah gadang takah kini,

Buyuang nan tingga di nagari Minangkabau dimanao anak nan lah mulai gadang biasonyo pai marantau, kalau ndak pai marantau harago diri laki laki tujatuh dek urang kampung, Buyuang nan lah samakin gadang takana lah dek Si Buyuang pai marantau, pado malam hari batanyo jo lah si Buyuang ka amaknyo.

“Mak, yuang pai marantau lai yo mak, malu Buyuang dek urang nagari kalau Buyuang hanyo tingga di kampuang Mak,”kato Si Buyuang ka amaknyo sambi balinang aia mato .

“lai talok dek Buyuang pai marantau?, nagari rantau ndak samo jo nagari wak do nak,”jawek amaknyo sambia manitiak an aia mato

Ndak tahan Si Buyuang calik amaknyo mnangih pai lah Buyuang ka kandang kabaunyo sambi baibo hati bacaritolah Buyuang ka kabau nyo.

“bau taibo hati den liak amak manangih raso ndak katalapehan karantau dek amak bau” kecek Buyuang ka sikabau sambi manggusuk an kapalonyo

“ kok kareh hati tuan untuk pai marantau, pai lah tuan, lamo ka lambek amak tuan pasti kamangarati”jawek sikabau nan sadang makan rumpuik

Hari baganti hari bulan baganti bulan batekatlah Si Buyuang pai marantau, amak nan sabulumnyo indak setuju kalau Si Buyuang pai marantau kini alah setuju karano maliek tekat Si Buyuang

Tibolah hari dima Si Buyuang bajalan mamintak izinlah si Buyuang ka amaknyo

“Mak, Buyuang bajalan lu mak doaan Buyuang barakaik iduik di kampung urang mak”kato Si Buyuang ka amaknyo sambi manjawek tangan amaknyo

“iyo nak bajalan lah elok-elok nak, ingek juo amak di kampung nak, jikok lah sukes Buyuang di kampung urang jan sakali sakali Buyuang takabua nak jadilah urang nan paguno di masyarakaik nak, ingek kato ama “dima bumi dipijak di situ langik dijungjung” do’a amak taruih samo buyungnyo “ kato Amak Si Buyuang

Sabalum Si Buyuang barangkek dari rumah, pai lah Buyuang ka kandang kabaunyo

“bau, ambo pai dulu jago amak den elok-elok” kato si buyung ka kabau

“iyo tuan den ka manjagoan amak tuan, tuan elok elok lah di rantau urang jan sampai tuan mambuek ulah di rantau urang tuan”kato si kabau ka si buyung

“denai bajanji jo ang bau jikok den baulah di rantau urang den rila dapek panyakik manyegak an nyo iyo aia dari kubangan ang, supayo den ndak baulah di rantau urang den alah bajanji jo ang bau ”kato si Buyuang Janih ka Si Kabau

“kok baitu kcek tuan pai lah tuan, kok amak padia den manjagoan di kampung ko, kok sukses tuan di rantau urang, jan lupo jo kampung halaman tuan ”kato si kabau ka Buyuang Janih

“kok baitu kecek ang bau lah lapang juo hati den bajalan, den pai lu yo bau” kato Buyuang Janih

Bajalan jo lah Buyuang Janih jo pidati manuju ka Taluk Bayua, tibolah Si Buyuang di Taluk Bayua, hari nan waktu tu nan iyo sadang paneh garang, naiklah Si Buyuang ka ateh kapa nan gadang. Barek hati Si Buyuang maninggakan ranah minang, amak jo si kabau sarato urang kampung.

Balabuh lah kapa di tanah Jawa, kota nan ramai banyak panduduknyo baragam isinyo, indak singajo nampak si padusi rancak bajalan surang diri rambuik bak nayang taurai, idung bak lasung tungga, alis mato bak samuik bairing, bibia bak kalopak bungo mawar, kulik bak ubi bakubak, tinggi simampai, bajalan di tapi urang nan ramai,

“ndehh...rancak upiak nan surang tu lai” kato Si Buyuang di dalam hati

Tibo-tibo sigadih rancakko di gaduh dek pareman takajuik lah Si Buyuang Janih, tasiroklah darah didado balari lah Si Buyuang manyalamaik an padusi tu,

“woiii da.... manga uda gaduh adik ko?” kato Si Buyuang Janih ka pareman tu

“heeiiiii siapa lo.....berani beraninya lo “ kecek salah surang pareman sambi ka maninju Si Buyuang Janih.

Dek pandai basilek, 4 urang pareman tu hanyo sakali gelek langsung lari pereman-pareman tu.

“baa dik lai ndak baa?, kato Si Buyuang Janih ka gadih tu.

“iyo ndak baa do da, uda urang Padang?. Ambo urang Padang juo da, kok lai nio uda pai ka rumah ambo?, padia ambo kenalan uda jo Abak, karano uda nan alah manolong ambo”kato so gadih tu ka Si Buyuang Janih

“kok baitu kcek adik ndak baa juo do, soalnyo ambo baru bana sampai di siko, ambo indak tau pulo jo urang di siko, kok buliah tau ambo namo adik sia?” tanyo si Buyuang Janih ka gadih tu sambi bajalan ka rumah gadih tu.

“namo ambo Jamilah da, kok bulih ambo tau uda tingga dima da, di siko uda pai katampek sia kok buliah tau namo uda sia?” kato Si Jamilah ka si Buyuang Janih.

“ambo urang Pauh, Jamilah, ambo di siko pai marantau namo ambo Buyuang ”kato si Buyuang ka Jamilah.

Bacarito-caritolah Si Jamilah ka Si Buyuang sambi bajalan ka rumah Jamilah, rumah Jamilah indak lah jauh ndak lamo asik bacarito sampailah si Buyuang ka rumah si Jamilah, rumah nan rancak taman nan lueh

“Mantuknyo Jamilah anak urang barado”bakato kato si Buyuang di dalam hati

Assalamulaikum mak, bak......

“Waalaikum salam,, masuklah Jamilah, amak sadang di dapua” jawek amak Jamilah dari dalam rumah

“Masuk lah dulu da”sambi mampasilahan si Buyuang masuk

Ndak lamo siap tu, kalua lah Abak Si Jamilah

“eeehhhhh......ado tamu mah, Jamilah buek an lah aia dulu ”kato Abak ka Si Jamilah

“iyo......bak” jawek Jamilah sambi bajalan ka dapua

“anak dari ma ko?, kawan Jamilah anak? Tanyo Abak Jamilah

“ambo dari Padang pak, ambo sobok Jamilah di gaduh dek pareman tadi Pak, tu ambo tolong Jamilah pak” kato si Buyuang Janih

“makasih banyak alah tolong anak apak nak, kok bulih apak tau sia namo anak ko?” tanyo Abak Jamilah

“namo ambo Buyuang Janih pak

 Lah asik bacarito-carito aia nan dibuek Jamilah tadi pun alah siap

“minumlah da Buyuang” saru Jamilah ka Si Buyuang Janih

“makasih Jamilah” kato si Buyuang Janih ka Jamilah

“Jamilah ka balakang dulu da, ka manolongan amak manyamba,”kato Jamilah ka Buyuang Janih

“iyo,,, Jamilah” jawek Buyuang Janih

Sambi maminum aia nan di buek an Jamilah tadi di lanjuik an pulo carito Abak  Jamilah jo Buyuang Janih tadi

“yuang lai ado karajo di siko?”tanyo Abak Jamilah ka Buyuang Janih

“alun lai pak,”jawek si Buyuang Janih

“kok alun bakarajo Buyuang lai, karajo lah samo apak, apak ado kadai, tapi ndak ado nan maabeh an doh” kato Abak Jamilah

“jadi, pak” Jo hati sanang Buyuang manarimo tawaran dari Abak Jamilah

Hari baganti hari, minggu baganti minggu, bulan baganti bulan tahun baganti tahun si Buyuang manjalanan tugasnyo  mambuek sanang Abak Jamilah dari usaho nan alun bajan sampai usaho nan di jalankannyo sukses, tokoh nan di kelola Si Buyuang indak jauh dari rumah Jamilah satiok hari Jamilah sobok jo Si Buyuang mambuek tumbuh raso cinto dek kaduonyo

Abak Jamilah nan suko mancalik karajo jo parangai Si Buyuang nan elok jo amanah ko taniek di hati Abak Jamilah untuk manikahkannyo. lagi pulo anaknyo katuju pulo samo Si Buyuang.

Indak parangai nyo sajo nan elok tapi Buyuang juo mampunyoi badan nan rancak kulik bak ubi bakubak badan nan tinggi badagok dan mampunyoi ilmu silek mambuek Abak jo Amak Jamilah samakin nio manikah an Jamilah jo Si Buyuang.

Pado hari tu Abak Jamilah duduk di kadai si Buyuang

“yuang nampak dek apak lah panjang calik Buyuang ka Jamilah mah?”tanyo Abak nyo

Si Buyuang hanyo tasipuh malu dari pertanyaan ayah Jamilah

“kok katuju ang jo anak apak, baok lah urang gaek ang malamar anak apak,”kecek ayah Jamilah ka si Buyuang

Dek ulah malu mengakui amak Buyuang nan lah gaek, jo nan ndak ado Buyuang agih kaba buyung baduto kapado ayah Jamilah

“ambo anak yatim piatu pak, ayah tiado ba mande pun tido”jawek Si Buyuang

“Kok baitu kecek Buyuang padia apak se nan maurus baralek Buyuang jo Jamilah”kecek Abak Jamilah ka Bayuang

Lah tibo di hari nan bahagia si Buyuang, tapi amaknyo indak juo di agih kaba, Hiduik sanang Buyuang di rantau mambuek Buyuang lupo samo amaknyo. satiok hari amak Buyuang manantian kadatangan Buyuang dari satiok hari badoa supayo Si Buyuang dapek pulang ka kampung. Hari hari nan jilankan amak di kampung hanyolah maagih makan kabau, pado maso tu amak nan sadang mangambaloan kabau.

“bau, baa kaba Si Buyuang di rantau yo, baa ndak ado kaba dari Si Buyuang lai ko sehat nyo di situ lai kok makan nyo di rantau, lah 3 tahun ndak ado kaba Si Buyuang, taragak bana ambo jo si Buyuang bau” bacaritolah si amak ka si kabau

“saba dulu mak Buyuang lai ka pulang jo pitih nan banyak pasti tabangkik batang tarandam dek siBuyuang mak,” jawek si kabau ka si amak. Hari hari nan di jalan kan amak jo ka si kabau hanyo baitu-baitu sajo sadangkan si Buyuang hiduik sanang di kampung urang

Hiduik nan serba bakacukuikan, samo bini nan rancak dan serba mewah mambuek Si Buyuang manjadi angkuh jo sombong, bahkan inyo semena-mena jo urang bahawannyo dan Buyuang kni nan lah lupo jo amaknyo kandung nyo surang bahkan Buyuang ndak pernah maagih kaba lai ka amaknyo. Dek ulah parangai si Buyuang nan samakin sombong jo angkuh dek harato. Balaku lah sumpah nan lah pernah di ucapkan samo si kabau, badan Buyuang nan mulai gata-gata, namun indak dihiraukan bagi Si Buyuang mungkin hanyo sakik biaso. Tapi dari hari ka hari panyakik buyung samakin manjadi jadi, Jamilah bininyo lah jajok mancalik panyakik nan diderita Si Buyuang.

“iihhhhhh........ baa lah mode iko badan uda,?”tanyo Si Jamilah ka Si Buyuang.

“Ndak tau uda doh Jamilah” jawek si Buyuang ka Jamilah

Samakain hari panyakik Buyuang samakin parah, Jamilah nan intak tarimo samo keadaan Buyuang kini.

“kok mode ko jo uda taruih,,,, ambo ndak talok lamo-lamo samo uda lai do, sabaiknyo kito pisah sajo da”kicek Jamilah ka Si Buyung sambi mancalik jajok ka si Buyuang

“jan tinggan uda Jamilah, uda cinto jo Jamilah”jawek si Buyuang ka Jamilah

“indak do da, ndak tahan denai samo uda doh”pai lah Jamilah maninggan si Buyuang

Balik lah Jamilah ka rumah rang gaeknyo

“bak ambo nio pisah samo uda Buyuang bak, mancalik panyakik nyo sajo ambo jajok bak, ndak tahan dek ambo samo inyo do bak” kato Jamilah ka Abaknyo

“baa kok sampai sakik Si Buyuang? aden iyo pulo lah maleh mancalik Buyuang nyo tu alah angkuh jo sombong dek gara-gara den agih usaho” kecek Abak Jamilah ka Jamilah

“ambo ndak tau baa dek sampai uda Buyuang takah itu”kato Jamilah ka Abaknyo

“kok baitu kecek Jamilah, bisuk kito turuik Si Buyuang”kato Abak Jamilah

Tibolah si Abak Jamilah manuruik Buyuang mausi Buyuang dari tokoh jo rumah nan alah di agih Abak Jamilah ka Si Buyuang. “woiii....... yuang paii lah Buyuang dari siko, pulang lah buyung ka kampung, Jamilah indak nio samo Buyuang lai, aden pulo indak sudi punyo minantu nan bapayakik kumuh mode ko” kicek Abak Jamilah ka Buyuang.

“jan usi den bak, samo siapo ambo tingga lai bak”jawek buyung ka Abak Jamilah sambi manangih

“den ndak nio tau kalua ang dari siko”jawek Abak Jamilah

Nio indak nio Si Buyuang tapaso angkek kaki dari rumah tu dan maninggakan sagalo harto, nan hanyo di agih dek Abak Jamilah hanyolah pitih nan cukuik untuk ongkos pulang ka kampong. Jo putus asa si Buyuang takana lah dek Si Buyung janji nyo kapado si kabau jikok nyo dapek panyakik aia paubeknyo hanyolah aia kubanganyo. Ndak bapikia panjang pulang lah si Buyuang ka kampung, tibo di kampung Buyuang sangat malu dek urang kampung karano urang kampung taruih mancacek si Buyuang.

“iiihhhhh...........apo panyakik ee tu?” kato urang mancacek Si Buyung. “iyo.. baa kok sampai mode itu nyo tu, apo nan nyo karajoan di kampung urang”mambaleh kecek urang tu.

Lah taibo hati Buyuang mandanga kato urang kampung nan bak kian. Lah sampai di rumah Si Buyung, nyo carilah  amaknyo,  basobok lah si buyung jo amaknyo di cium lah kaki amaknyo.

“Mak maaf an Buyuang, Buyuang alah durhako kapado amak, Buyuang alah malangga janji Buyuang mak”, sambi manangih jo mancium kaki amak buyung. “tagak lah nak kandung, carito jo amak baa sampai takah iko badan buyung?” tanyo amak buyung

Nyo caritoan lah dek si buyung ka amak nyo apo sajo nan tajadi lah jaleh dek amak sadonyo.“Nan bisa maubek an panyakik den ko iyolah aia dari kubangan kabau mak dulunyo ambo pernah bajanji jo si kabau jikok ambo baulah di kampung urang aia paubek an nyo aia dari kubangan kabau mak”, kecek si Buyuang ka amaknyo. “kok baitu mari kito katampek kabau bakubang nak”. Sambi maajak si buyung ka tampek kabau. Tibo lah buyung ka tampek kabau, takjuik lah kabau mancalik si Buyuang

“tuan baa takah iko kulik tuan?”tanyo si kabau

“ambo alah mungki janji ka kabau, kito pernah bajanji dulu jikok ambo baulah dirantau urang ambo ka mandapek panyakik ”jawek Si Buyuang Janih.

Bacaritolah si buyung jo kabau apo sajo nan tajadi

“kok baitu tuan, barandam lah di aia kubangan ambo tuan”kcek kabau ka Si Buyuang Janih

“jadi kabau”jawek si Buyuang Janih.

Barandamlah si Buyuang ka dalam kubangan kabau, indak lamo siap tu panyakik Buyuang hilang, kini buyung alah cegak takah biaso dan manjalan kan aktivitas di kampung sajo basamo amaknyo.

Ooohhhh takah itu carito nyo Lela

“jadi mode tu mako di sabuik kubang Lela?”tanyo ambo ka Si Lela

“iyo, sampai kini aia kubangan kabau tu paguno juo dek urang untuk maubek an panyakik” kato Si Lela

“iyolah Lela ambo manolongan amak ka sawah balik, lah lamo pulo kito bacarito dari tadi.” ambo nan sambi tagak siap-siap ka maolongan amak.

*Mahasiswa Sastra Minangkabau FIB Unand